Jako ajar ari St.Paul ngagai Timoti pasal ka pengawa kitai ti idup didunya ti enda kala puas ngiga pengeraja ka diri empu ngambika kitai idup lantang enggau senang ba dunya. Tang pengeraja tauka pengaya ti di giga kitai nyuruh kitai pedis. Makin kitai enda puas ati. Udah bulih maioh, kitai ka ngiga balat agi lalu ngujong ka sekeda orang ngereja pengawa ti salah. Aku deka maie kitai merati ka jako ajar St.Paul ngambika kitai sama bela berunding ka jako iya. Nadai salah kita ngiga pengaya enggau pengeraja tang kita anang ninggal ka pengarap kitai ka Tuhan. Baka ni kitai patut ngena pengaya enggau pengeraja ti dikemisi kitai.Kitai enda ulih madah ka "O...aku enda beguna ka duit. Bula orang nya. Enti ka ka jamban kitai bebayar..duit nya, enti ka ka pasar ngena motor tentu kitai meli minyak...duit. Sekeda orang kaya laban bisi ngembuan pemandai ti tinggi lalu nerima gaji ngagai bepuloh ribu sebulan, sekeda orang muka kedai, bedagang enggau maioh agi kerja ti mai penguntung ti besai. Aku ukai nyalah ka orang ti kaya tang utai ti di kenggai ka Tuhan bisi di sebut St.Paul ba ajar iya.
1 TIMOTI 6:6-19
1. Puas ati ti kemisi diri.(ayat 6-8)
Ba 1 Timoti 6:6 -8 St.Paul madah ka kitai, kitai patut puas ati ka utai ti kemisi diri.Nya alai ko
St.Paul, " enti kitai bisi pemakai enggau gari, nya cukup ka kitai. Nya alai pengarap amat baguna ba
kitai laban ulih pengarap kitai ka Tuhan, kitai selalu besyukur ka pemisi kitai laban kitai nemu Tuhan deka
selalu nyedia ka kitai.Kitai enda ulih mai pengaya enggau pengraja leboh kitai mati. Iya ti di bai kitai ka
larong kasut, tanchut, baju enggau larong. Diberi orang ka emas tauka intan, utai nya semina ba larong
aja. Tang iya ti dibai kitai pulai ianya samengat kitai ti endor kitai ka kena pechara ba moa Tuhan. Enti
kitai bedosa tentu kitai ka neraka. Enti kitai idup nitih ka peneka Tuhan lalu talok ka Iya tentu kitai deka
dibai begulai enggau Iya di serga. Samengat kitai enda nemu mati tang tuboh kitai nya ti mati.Pengarap nya
ti mai kitai bekempil enggau Tuhan.Lalu ko Jesus, " Barang sapa ti arap ka Aku enda mati tang tau bulih
pengidup ti meruan. John 3:16.
2. Deka ka diri kaya kena sintak panjok (ayat 9)
Jako "deka ka diri kaya" reti nya orang nya bebendar ngiga pengaya. Enda nemu jalai nya salah tauka
ngena, pajak ka aja asal bulih duit, pengaya enggau penyenang. Nya alai St.Paul ditu madah maioh orang
kena penguji lalu kena sintak panjok pemeli enggau pengingin ti tau ngemedis ti narit orang ngagai maioh
bengkah pengerusak enggau pemerinsa. Ngambika conto: Orang sanggup enchuri, ngerumpak, nyual indu,
nyual dadah, nyual tanah orang ti ukai enggi iya lalu maioh macham agi conto ti bukai. Orang nya sanggup
laban pengingin ka ka diri kaya lalu iya ngiga jalai ti muntang lalu enda ngerunding ka jalai ti di tengah iya
nya salah lalu di kenggai ka Tuhan.
3. Angkun ka duit lalu ninggal ka pengarap (ayat 10)
Lalu utai ti di kenang Paul ka ketiga tu, Ia nya sekeda orang kelalu angkun ka duit lalu ninggal ka pengarap.
Ngambika conto; Sekeda orang enda nemu hari agi. Hari satu ia enda nemu, hari minggu ia enda nemu
laban kelalu rindang ngiga duit tauka nugong ka reta. Tuhan madah ka kitai Hari Minggu ia nya hari Tuhan
dalam Sepuloh Pesan. Tang sekeda kitai enda bebasa ka hari Tuhan. Sekeda orang sida mansa gerija tang
enda singgah laban ka bekerja ngiga duit. Sekeda orang nganjong anak bini ka gerija tang ia empu enda
laban bisi urusan penting. Reti nya ia udah ninggal ka pengarap. Nadai agi ba ati ia Tuhan Jesus. Semina ba
ati ia duit....Tang leboh ia kena penusah baka mati, dulu ia ngiga gerija lalu madah ka diri Kristian. Enti
Paderi tauka Pastor enggai nerima tauka enggai besambiang, sida nganu Paderi tauka Pastor. Sekeda lalu mandang ka pengaya ....Berapa ka pinta kita kami ulih mayar Sida Paderi / Pastor ukai beguna ka utai nya tang nama reti ia ditumbak ba pendam kristian tang samengat ia ukai ka serga. Bisi siti cerita, bisi siko laki bebini nguai ka menoa orang. Laban Iya udah lama netap ba menoa nya. Nya alai ketuai Gerija nya minta ia ngerigister sida sebilik ngambika sida di intu raban Kristian ti diau dia. Laban ba ator sida ba menoa nya lebih-lebih agi raban komiti kubur barang sapa enda ngeregister ba menoa nya enti ia mati ia enda tau di pendam ba menoa nya. Utai tu nyadi ba iya empu. Iya mati ngenyit laban kena strok. Nya alai sida sebilik nyau kiruh. Sida bala kaban ia minta sida komiti ngelunggar ka undang pendam tang sida komiti enda nerima. Nya alai sida nyau ngiga chara. Enggai nyadi enti enda di kubor. ukai nya bangkai mayau tauka ukoi.Barang endor nanam ia. Betanya ka gerija bukai (sama gerija nya tang ba menoa lain) enda ulih nerima laban ia ukai orang ba menoa siti nya. nyau ka puas-puas mujor ga sida ketuai-ketuai nyau kiroh laban ia lalu besetuju ngubor ia. Tu utai ti dikenggai ka kitai. Udah ga merinsa di dunya merinsa ga ka ngubor ia. Nya alai nadai salah kita ngiga pengaya enggau pengeraja tang kitai anang sekali-kali ninggal ka pengarap laban nya antara kitai enggau Tuhan. Tuhan enda ulih nulong kitai enti kitai enda arap ka Iya. Ukai Tuhan nadai kuasa tang kitai patut ingat ka jako Iya. Barang sapa ti arap ka aja deka bulih pengidup ti meruan.
4. Giga ati ti lurus, ti nangi ka Tuhan ti arap, ti rindu, ti liat enggau ti baroh.(ayat 11)
Paul ngajar kitai ngiga ati ti lurus lalu nangi ka Tuhan lalu enggau pengawa ti baka nya tau nyelamat kitai. Ko Tuhan Jesus anang nangi ka orang ti tau munoh tuboh tang nangi ka orang ti tau munoh tuboh enggau samengat.
5. Anang sumbong lalu anang bepanggai ba pengeraja ti enda tentu.(ayat 17)
Paul ngajar kitai anang sumbong ka pemisi diri tauka pengeraja ti enda tentu tang ba Tuhan. Peda kitai nama penyadi dunya kemaia hari tu. Leboh kitai meda menoa ampuh bah, gempa bumi, beperang enggau maioh agi. Samoa reta baka rumah ti manah ti bebillion rega ia anchur,kereta ti mar anchur. Paul ngajar kitai awak ka kitai bepanggai ba Tuhan ti enda berubah pengerindu Iya.
6. Asoh orang ti kaya ngaga kerja ti badas.(ayat 18)
Paul mesan Timoti ngasoh iya madah sida ti kaya ngaga kerja ti badas ngambika sida nyadi Raja dalam kerja ti badas, selalu deka nulong orang lalu besedia deka magi utai enggau orang bukai. Lalu ko Paul ngena jalai nya sida deka nyimpan pengeraja ka diri empu ti nyadi tiang pemun pengidup ka dudi ila. Tang maioh kitai enggai nulong laban takut ka miskin lalu sayau ka reta. Ingat ka jako ba Jako Dalam 19: 17 " Enti kita meri utai ngagai orang ti seranta, nya sebaka enggau kita ti nyali utai ngagai Tuhan, laban Tuhan deka malas pemanah kita nya".
Kena aku ngujong ka jako aku, aku ngambi jako St.Paul awak ka dikena kitai semua ngambika ka kitai bejimat diau didunya ingjau tu.
1 Timoti 6:12
" Belanda enggau naka penegar nuan dalam lumba pengarap, lalu ulih ka pengidup ti meruan ka diri empu; laban Tuhan udah nganggau ka nuan ngagai pengidup nya leboh nuan besaksi ka pasal pengarap ba moa orang maioh. Amen.
No comments:
Post a Comment